TURISMO

Santiago de Compostela promociónase como destino turístico na feira turística máis importante de Asia

18/10/2018 Turismo de Santiago participa entre o 17 e 19 de outubro na Feira ITB Asia, o maior encontro profesional de turismo de Asia e Pacífico, que se celebra en Singapur. Trátase da terceira edición consecutiva na que Turismo de Santiago participa na ITB Asia, logo que no 2016 se tomase a decisión de apostar pola participación neste evento como unha fórmula para posicionarse nos principais mercados asiáticos.

A asistencia de Turismo de Santiago ao evento responde á necesidade de promoverse directamente ante un dos mercados turísticos máis dinámicos e de maior crecemento no mundo, tras constatar, por unha banda, o aumento do número de turistas procedentes do sueste asiático nas oficinas municipais de turismo nos últimos anos e, por outra, os informes favorables recibidos de Turespaña e do Grupo Cidades Patrimonio de España.

Neste marco propicio para establecer contactos de primeiro nivel coas empresas turísticas líderes da rexión, como turoperadores de viaxes de lecer e do sector de congresos e turismo corporativo, a axenda de Turismo de Santiago inclúe múltiples reunións con axencias e profesionais de Xapón, China, Singapur, Corea, Australia, Indonesia, Filipinas e Tailandia.

Compartir: