CONSORCIO

A violoncellista principal da Orquestra de RTVE, Suzana Stefanovic, formará neste instrumento a novos talentos galegos

05/02/2019 A Escola de Altos Estudos Musicais (EAEM), con sede en Santiago de Compostela, dispón dun programa de formación permanente dirixido a intérpretes novos. No marco deste proxecto, ofrécese a posibilidade de asistir ao longo do ano a unha serie de clases maxistrais que imparten solistas de prestixio internacional.

A vindeira semana contarase coa presenza da violoncellista Suzana Stefanovic, o día 16 de febreiro, de 9:30 a 15:30 horas. Ademais do alumnado da Escola, tamén poden asistir a estas clases músicos/as externos/as ao centro. Os interesados en participar nestas sesións poderán matricularse a través da páxina web da Escola: www.eaem.es. Os/as aspirantes deben estar cursando como mínimo os últimos cursos de grao medio de música.

Suzana Stefanovic toca un violoncello de 1827
Suzana Stefanovic naceu en Belgrado, onde iniciou os seus estudos musicais aos sete anos de idade. Logo trasládase aos Estados Unidos e máis tarde a Barcelona, onde foi solista da Orquesta Ciudad de Barcelona e profesora no Conservatorio do Liceo. Leva case dúas décadas como solista da Orquestra de Radio Televisión Española e na actualidade é ademais profesora do Conservatorio de Guadalajara en Madrid.

Dende os inicios da súa carreira musical ten gañado numerosos galardóns. Destaca o Primeiro Premio do Concurso de Artistas Musicais en Zagreb en 1987 e o Premio "Outubro" da cidade de Belgrado á súa "intensa actividade musical" en 1980.

Tocou coas orquestras máis prestixiosas de Europa, entre elas a Orquestra de Cámara Europea; baixo a batuta de grandes directores. Ten estreado obras compostas para ela. Ofrece clases maxistrais por toda España e é convidada con frecuencia a impartir cursos en conservatorios e a traballar coas xoves orquestras do país. Toca un violoncello Gaetano Guadagnini do ano 1827.

Compartir: