ALCALDÍA

O alcalde recibiu a Adriana Calcanhotto antes do seu concerto deste venres

26/04/2018 O alcalde de Santiago, Martiño Noriega, e a concelleira de Acción Cultural, Branca Novoneyra, recibiron a Adriana Calcanhotto. A artista brasileira ofrecé mañá venres un concerto no Auditorio de Galicia a partir das 20:30 horas.

As entradas están á venda a un prezo de 20 euros. Poden mercarse en entradas.abanca.com, no 981 910 522 ou no despacho de billetes do Teatro Principal (aberto de martes a sábado e días de evento, de 18:00 a 21:00 h) e mañá venres, día do concerto, tamén no despacho de billetes do Auditorio de Galicia.

Adriana Calcanhotto chega a Compostela días despois de estrear en Portugal o seu novo espectáculo, A mulher do Pau-Brasil. Esta xira marca a volta aos escenarios dunha das artistas brasileiras máis queridas no país veciño.

Nomeada Embaixadora da Lingua Portuguesa pola Universidade de Coimbra en 2015, Adriana Calcanhotto ten desenvolvido un traballo de divulgación e estudo da literatura portuguesa xunto a diversas universidades europeas e brasileiras. Actualmente, no Brasil é vista como a "Embaixadora da Universidade de Coimbra" e, en Europa, séntese cada vez mais "A mulher do Pau-Brasil".

Inspirada polo movemento modernista brasileiro dos anos 20, no seu Manifesto da Poesía Pau-Brasil, a súa influencia sobre o Tropicalismo (toda a información externa debe ser devorada e reinventada nos seus propios termos), e con base na aprendizaxe, pescuda e traballos realizados como profesora e embaixadora da Universidade de Coimbra, Adriana Calcanhotto crea un novo espectáculo, no cal reflicte todas estas novas experiencias. Éxitos, novas cancións, novas lecturas e reinvencións. Nestes concertos, Adriana Calcanhotto estará acompañada por Gabriel Muzak (guitarra, mpc e voz), e Ricardo Dias Gomes (piano, baixo e voz).

Bio e discografía
Adriana Calcanhotto iniciou a súa traxectoria artística a mediados dos anos oitenta, con presentacións en bares e casas nocturnas de súa cidade natal, Porto Alegre, no sur do Brasil. Tras unha serie de temporadas con éxito no circuíto vangardista de São Paulo, foi convidada a cantar en Río de Janeiro en febreiro de 1989. A boa repercusión da crítica levouna ao seu primeiro disco, Enguiço, en 1990. Tras el viñeron Senhas (1992), A fábrica do poema (1994) ou Maritmo (1998), para chegar no 2000 ao seu primeiro disco ao vivo, Público.

No 2002 gravou Cantada e no ano 2004 naceu o heterónimo infantil Adriana Partimpim, que estreou disco homónimo e organizou un espectáculo teatral, proxecto co que gañou un Grammy Latino na categoría de Mellor Álbum Infantil. Partimpim volvería aparecer en outros dous traballos: Dois no 2009 e Tlês no 2012. Despois do éxito de Partimpim, Adriana fixo unha xira por Europa co show +Ela, e xa de volta ao Brasil gravou o seu sexto álbum, Maré (2008), o segundo da triloxía mariña. En 2011 produciu o seu primeiro disco enteiramente autoral, O micróbio do samba, e máis adiante retoma o formato de voz e violín estreando en Lisboa o espectáculo Olhos de onda (2014), co que pecha a triloxía de referencias explícitas ao mar.

En decembro do 2015 é nomeada Embaixadora da Universidade de Coímbra e entre febreiro e xuño do 2017, a convite desta universidade, lecionou sobre poesía portuguesa e brasileira, trobadores provenzais, galegos, a invención da lingua portuguesa e a canción popular do Brasil, ademais de realizar varios workshops integrados nunha residencia artística. Participou en palestras e conferencias dando continuidade ao seu traballo de pescuda e divulgación da lingua portuguesa a convite de diversas universidades nen Brasil e Europa. Froito disto chega o seu novo traballo, A mulher do Pau-Brasil.

Compartir: