EDUCACIÓN E CIDADANÍA

As escolas infantís celebran o Entroido

04/02/2016 As escola infantís municipais de Conxo e de Meixonfrío-Salgueiriños celebraron este xoves a tradicional festa de Entroido, coa que pechan o programa de actividades no que estiveron traballando nestas datas. O concelleiro de Educación e Cidadanía, Manuel Dios, achegouse ata a Escola Infantil Municipal de Conxo para participar na festa "A granxa de Min".

O edil tivo a oportunidade de compartir e participar cos nenos e nenas, acompañados das súas familias e do equipo de educadoras, nos obradoiros e actividades, rematando cunha merenda elaborada polas familias con produtos tradicionais destas datas. Na xornada do venres, ás 16:00 horas, a festa de Entroido será na Escola Infantil Municipal das Fontiñas.

A Rede Municipal de Escolas Infantís vén a sumarse así á celebración da festa do Entroido, na que os centros educativos da cidade terán un importante papel nos vindeiros días. Así, os CEIP Lamas de Abade e Cardeal Quiroga Palacios participarán no desfile do martes de Entroido, e outros como o CEIP Pío XII teñen preparados festivais.

Ademais, durante as vacacións escolares de Entroido (8, 9 e 10 de febreiro), as escolas infantís ofrecerán ás familias, con nenos e nenas entre os 3 e os 8 anos e empadroados en Santiago de Compostela, un servizo complementario de obradoiros. Acompáñase información e impreso de solicitude.

Compartir: