NORMALIZACIÓN LINGÜÍSTICA

O Teatro Principal acolleu o espectáculo "Escoitando a Filgueira Valverde"

30/04/2015 Con motivo da próxima celebración do Día das Letras Galegas, a Concellería de Normalización Lingüística organizou no Teatro Principal a representación do espectáculo Escoitando a Filgueira Valverde, nunha sesión especialmente dedicada ao alumnado de secundaria dos centros composteláns e na que participaron 275 estudantes.

Nesta representación, creada e interpretada por Serafín Marcos, profesor no Conservatorio de Noia cunha dilatada experiencia neste tipo de iniciativas performativas nas que achega os autores ao público infantil e xuvenil, os asistentes puideron coñecer o universo de Xosé Filgueira Valverde da man dos personaxes que nos describe na súa obra.

O espectáculo iniciouse cun breve achegamento ao autor homenaxeado no Día das Letras Galegas 2015, dándose paso ás figuras que aparecen na súa literatura. Elas tomaron o protagonismo e, a través das súas experiencias, do seu contorno e das súas personalidades, mostrouse o mundo de Filgueira Valverde. Os nenos, os vellos, as historias que eles contan, os lugares onde viven, o traballos que fan; todo isto dá forma ao mundo no que se desenvolveu a literatura e a figura do erudito e polígrafo.

Compartir: