CULTURA
A entrada ao concerto será de balde ata completar as localidades do Teatro Principal.
"Música con sabor español" este domingo no Teatro Principal coa Banda Municipal
23/01/2015 O virtuosismo emocional e pasional será o leitmotiv que guiará o percorrido da Banda Municipal pola música nacionalista española, onde a evocación, a profunda tradición relixiosa do noso pobo e a herdanza árabe conflúe no flamenco como forma de expresión dos sentimentos máis profundos, con suxestivos ritmos, xiros musicais e sonoridades. Será este domingo, 25 de xaneiro, ás 12:00 horas, no Teatro Principal.
O concerto iníciase con dúas obras orixinais para banda; Danza Sinfónica, de J. Barnes, e El Duende de España, de A. Ferriz. O título desta segunda obra fai referencia a ese concepto etéreo e poético que posúen algúns intérpretes de flamenco, difícil de alcanzar na interpretación, pero que de lograrse envolve ao oínte nun áurea de emoción. Esta parte concluirá con dúas danzas das Danzas Fantásticas de J. Turina: Ensueño e Evocación. A Suite Española, de I. Albéniz, e España, de E. Chabrier, pecharán o concerto.A entrada ao concerto será de balde ata completar as localidades do Teatro Principal.